முதலாளியக்
கிழடை வீழ்த்துங்கள்
புதியவன்
செடிகளே கொடிகளே மரங்களே
அந்தக் கிழட்டுப் பூதத்தை வீழ்த்துங்கள்
பூக்களின் கதறல்கள்
காய்கனி அலறல்கள்
பசுமையே பதறுது பாருங்கள்
உம்மை உயிர் நீக்கும் கிழட்டு பூதத்தை
பாடை கட்ட நீங்கள் வாருங்கள்
கொடுவாய் கெண்டை
தாவிடும் கெவலை
மிதக்கும் பாறை சுறா மீன்களே
கடல்த்தாய் மடியின் ஜீவன்களே
எல்லாம் ஓரணி சேருங்கள்
அந்தக் கிழட்டுப் பூதத்தை வீழ்த்துங்கள்
இரசாயனக் கழிவுகள்
அணுகுண்டு பரிட்சைகள்
செத்து ஒதுங்குது வாழ்க்கைகள்
அலைகடல் தாயை வல்லுறவாக்கும்
கிழட்டு பூதத்தை வீழ்த்துங்கள்
நெளியும் புழுக்களே நிமிருங்கள்
சுருண்ட பாம்புகளே சீறுங்கள்
கடிக்கும் பூச்சிகளே நகரும் நத்தைகளே
வீட்டுச் சுவர்களின் எறும்புகளே
அந்தக் கிழட்டுப் பூதத்தை வீழ்த்துங்கள்
உலகப் போர்களால் உயிர் சாகுதே
மணலும் வெளியும் விசம் ஆகுதே
உயிர் வாழவும் நிலம் காக்கவும்
ஒன்றுபட்டு களம் சேருங்கள்
இலாப வெறி பிடித்த கிழட்டு பூதத்தை
தாக்கி அழிக்க நீங்கள் வாருங்கள்
அதன் மூளை நரம்புகளைத் தாக்குங்கள்
ஊரில் நுழைந்த யானை சிறுத்தைகளே
கொம்புள்ள மான்களே மாடுகளே
தேனடை தேடிடும் கரடிகளே
ஓடித் திரிகின்ற நரிகளே
சினமிக்க சிங்கம் பலமிக்க புலிகள்
காட்டுத் தாய்மடி விலங்குகளே
எல்லாம் ஓரணி சேருங்கள்
அந்தக் கிழட்டு பூதத்தை வீழ்த்துங்கள்
தந்தமும் தோலுக்கும் சுடப்பட்டோம்
மின்கம்பம் வேலிக்கு எரிபட்டோம்
இலாப வெறிபிடித்த கிழட்டுப் பூதத்தின்
வங்கி வயிற்றுக்கு பணமானோம்
நம் பற்களை நகங்களை
கொம்பின் நுனிகளை
கூர்மை தீட்டிக்கொண்டு வாருங்கள்
அதன் குடலை மாலையாக்கிப் போடுங்கள்
தோகை மயில்களே கூவும் குயில்களே
வீட்டுச் சேவல் கோழி குஞ்சுகளே
மரங்கொத்திகளே காக்கை பருந்துகளே
காற்றில் மிதக்கும் மலைக் கழுகுகளே
வானை அசைக்கின்ற பறவைகளே
அந்தக் கிழட்டுப் பூதத்தை வீழ்த்துங்கள்
நம் வானையும் காற்றையும்
திசைகள் முழுவதையும்
வாரிக் குடித்த அந்தக் கிழட்டு பூதத்தைக்
கொத்தி கொலை செய்ய வாருங்கள்
வலியோடு வாழும் அடிமைகளே
மக்களைப் பெற்ற தாய்க்குலமே
மனிதரில் மூத்த பழங்குடியே
கடலோடு வாழும் மீனவரே
பசிப்பிணி நீக்கும் உழுவோரே
உலகைச் செதுக்கிய உழைப்போரே
படிப்போடு வாழும் மாணவரே
எதிர்காலம் இருண்ட இளையோரே
உலக உயிர்களுக்கு உணர்த்துங்கள்
இயற்கைக்கு நாமுயர் அங்கங்கள்
எல்லாம் ஓரணி சேருங்கள்
சமூகவிஞ்ஞானிகளாய் மாறுங்கள்
அணுக்கதிர் கழிவுகள் ஆயுதக் குவியல்கள்
முடித்திடும் பூமியின் போக்குகள்
ஆறு கடல்கள் ஏரி குளங்கள்
முழுங்கிடும் காடுகள் மலைகள்
இயற்கை வளங்கள் மனிதத் திறன்கள்
மென்றிடும் கணிப்பொறி ஆலைகள்
நிலநடுக்கங்கள் கடல் ஏற்றங்கள்
புயல் மழை வெள்ளம் சீற்றங்கள்
உற்பத்தி முடக்கங்கள் பொருளின் தேக்கங்கள்
பெருகிடும் கடன் வட்டி எழவுகள்
பாலியல் வன்மங்கள் தற்கொலை முடிவுகள்
பஞ்சம் பட்டினி சாவுகள்
காயும் சூரியக் கதிர்கள்
உருகும் ஆர்டிக் பனிகள்
சிதறும் எரிமலை வெடிகள்
நொறுங்கும் பூமியின் முகங்கள்
உலகம் முற்றிய அவலங்கள்
இந்தக் கிழட்டுப் பூதத்தின் சிரிப்புகள்
சமூகவிஞ்ஞானிகளின் திட்டங்கள்
பொதுவுடைமை செல்லும் பாதைகள்
இந்தக் கிழட்டுப் பூதத்தை வீழ்த்துங்கள்
சுற்றி வளைக்கலாம் வாருங்கள்
இந்தக் கிழட்டு பூதத்தை வீழ்த்திவிட்டால்
பூமியில் பூக்கும் புன்னகைகள்
சமூகவிஞ்ஞானிகள் தோற்றுவிட்டால்
உலகின் அழிவே மாற்றங்கள்
முடியப் போகிறது முதலாளியக் கிழடு
முடிக்கப் போகிறது மக்களின் அரசு
தொடரப் போகிறது சமூகத்தின் மேன்மை
தொடங்கப் போகிறது பொதுவுடைமையின் பாதை!
No comments:
Post a Comment