விதி-1.1.2 உள்முரண்பாடும் x வெளிமுரண்பாடும் (சிறுகதை 1,2,)
அந்த அம்மாவுக்கு வயசு அறுபத்தெட்டு. அவரை கெழவி என்று அழைப்பார்கள். கெழவி டெங்கு காய்ச்சலில் படுத்திருந்தாள். கெழவியின் மகளுக்கு சில நாட்களாகவே முகம் செத்துவிட்டது. அம்மா இறந்துவிடுவாளோ! உச்சி முதல் பாதம் வரை பயத்தின் உருவமே அவளுக்கு. கெழவியின் இழப்பை அவளால் தாங்க முடியாது. மருத்துவச் செலவுக்கு துணிகிறாள். தொடர் வைத்தியம் செய்கிறாள். கெழவியின் கைகளில் ஊசிக்குழாய் வழியாக குளுக்கோஸ் ஏற்றப்படுகிறது. உடல் குளுமையைச் சமாளிப்பதற்காக மின்விசிறி நிறுத்தப்படுகிறது. மிகவும் கவனிப்புக்குரிய முறையில் உணவும் மருந்தும் ஊட்டப்படுகிறது. இரவிற்குள் ஒரு நடுக்கம் ஏற்பட்டது. விடிவதற்குள் கெழவி இறந்துவிட்டாள். மகள் எழுந்து பார்த்தாள். பொழுது விடிந்துவிட்டது. மனசு இருண்டுவிட்டது.
கெழவியின் வாழ்க்கையிலிருந்து உள்xவெளி முரண்பாட்டை உணர முயல்வோம். கெழவியின் உடலில் உயிரணுக்களின் இயக்கத்தைக் கவனியுங்கள். புதிய உயிரணுக்கள் ஏராளமாகத் தோன்றுகின்றன. பழைய உயிரணுக்கள் நிதானமாக இறக்கின்றன. நோய்க்கு ஆளாகும்வரை கெழவியின் ஆரோக்கியம் இப்படித்தான் இருந்தது. ஆனால் டெங்கு காய்ச்சல் பாதித்த பிறகு நிலைமை வேறு. புதிய உயிரணுக்கள் தோன்றுவது ஏராளமாக குறைந்தது. பழைய உயிரணுக்கள் ஏராளமாக இறந்தன. இவ்வாறு உயிரணுக்களில் நிகழ்கின்ற தோன்றுதலுக்கும் இறத்தலுக்கும் இடையிலான முரண்பாடே உள்முரண்பாடாக இருக்கிறது. கெழவியின் உடலுக்குள் நிகழ்கின்ற உள்முரண்பாடே அவளது வாழ்வையும் சாவையும் தீர்மானிக்கிறது. வாழ்தலுக்குத் தேவையான உயிரணுக்களின் அளவை இழந்ததும் கெழவி இறந்துவிடுகிறாள்.
கெழவியை மரணத்திலிருந்து காப்பதற்காக ஏராளமான மருந்துகள் கொடுக்கப்பட்டன. தேர்ந்தெடுக்கப்பட்ட உணவுகள் முறையாக ஊட்டப்பட்டன. இவை கெழவியின் உயிரணுக்களை வலிமைப்படுத்துகின்றன. அவளது வாழ்வு நீடிப்பதற்கு ஊக்கம் தருகின்றன. ஆனால், பாதுகாப்பற்ற சுற்றுச்சூழலும், பொருத்தமற்ற தட்ப வெப்ப நிலையும், மாசு நிறைந்த சுவாசக் காற்றும் கோடிக்கணக்கில் உற்பத்தியாகும் நோய் பரப்பும் கொசுக்களும் கெழவியின் உயிரணுக்களை பலவீனப்படுத்துகின்றன. அவளது மரணத்தை வேகப்படுத்கின்றன.
வாழ்தலை நீடிப்பதற்கும் மரணத்தை விரைவுப்படுத்துவதற்கும் இடையிலான போராட்டம் இங்கு உணரப்படுகிறது. கெழவியின் உடலுக்கு வெளியிலிருந்து இந்த முரண்பாடுகள் செயல்படுகின்றன. இவையே வெளி முரண்பாடுகள். இவை உள்முரண்பாட்டின் மீது ஆளுமை செலுத்துகின்றன. வாழ்வையும் சாவையும் தீர்மானிப்பதற்கு ஊக்கம் தருகின்றன. இப்படித்தான் மரணம் நிகழ்கிறது.
பார்வையற்ற சிறுமிக்கு கெழவியின் கண்கள் பொருத்தப்பட்டு விட்டது. அந்தச் சிறுமி என்ன அழகாக வேடிக்கை பார்க்கிறாள். மனசெல்லாம் மத்தாப்பு. இறந்த உடலில் இறக்காத உயிரணுக்களை உணர முடிகிறதா? இறந்த கெழவியின் உயிருள்ள கண்களை சிறுமியிடம் பாருங்கள். ஆம்! கெழவி முழுசாக இறக்கவில்லை.
கெழவி வாழ்கிறாள் என்ற மகிழ்வோடு ஒரு சாதிய நிகழ்வை கவனிப்போம். ஓர் ஆதிக்கச் சாதியினர் குடும்பத்தில் ஓர் இறப்பு. சாவுப்பறை ஊரெல்லாம் அதிர்கிறது. இறந்தவரின் ஊர்வலம் நிகழ்கிறது. ஆதிக்கச்சாதி ஆண்கள் குடித்துவிட்டுக் களிப்புடன் ஆடுகிறார்கள். அய்யோ பாவம்! அந்தப் பறை இசைக்கின்ற கலைஞர் படாதபாடுபடுகிறார். எத்தனை வசை மொழிகள்! எத்தனை இழி சொற்கள்! சிறுவர்களிடம் சிக்கிய நாயைப்போல பரிதவிக்கிறார். அந்தப் பறைக் கலைஞரின் குமுறலைக் கவனியுங்கள். ஆதிக்கச் சாதியரின் அடிாவடிப் பேச்சுகளுக்கு எதிராக விண்ணதிர முழங்கும் தலித் சாதியின் பேச்சைக் கவனியுங்கள். இழக்கப்படும் சுயமரியாதையால் கோபம் கொந்தளிக்கிறது. இவர் எழுப்பும் ஆயிரம் வசைச் சொற்கள் பறையொலியாக விரிகின்றது. பறையைச் சுற்றி ஆடுகின்ற சாவு வீட்டுக்காரர்களுக்கு பறையின் மொழி தெரியாது. பறையொலியாக எழுகின்ற தங்களுக்கு எதிரான வசைச் சொற்களைச் சொரணைக் கெட்டு இரசிக்கிறார்கள். அவர்களது ஆட்டம் தொடர்கிறது. தலித்துக்களின் வரலாற்றுக் கோபம் விண்ணதிர முழங்கியதால் இசைப்பறை கிழிந்தது. அவனுக்கு கோபம் அடங்கவில்லை. வீடு சேர்ந்த பின்பும் அவனது நினைப்பு சாவு வீட்டிலேயே இருந்தது. அவர்களின் கேவலமான நடத்தையை நினைத்து நினைத்து வருந்தினான். வீட்டுக்காரி வெடுக்கென்று வைத்தாள். நேர்த்தியாக சமைக்கப்பட்ட பன்றிக்கறி. விருப்பமின்றி வாயில் வைத்தான். ஆதிக்கச் சாதியரிடம் வாய்க்கு வாயாகப் பேச முடியாத அவனது கோபத்தைக் கொட்டித் தீர்ப்பதற்கு வாய்ப்பு கிடைத்தது. உண்ண முடியாதபடி உணவில் உப்பு. வீட்டுக்காரியிடம் பாய்ந்தான். அவளும் விடவில்லை. இருவரும் சண்டையிட்டார்கள். தெருவெல்லாம் நாறியது அந்தச் சண்டை. சாவு வீட்டார் ஏற்படுத்திய வேதனைகளை வீட்டுக்காரியிடம் இறக்கிவைத்தான். வீட்டுக்காரியின் வீக்கங்களில் தேங்கியிருந்தது அந்த வேதனை.
இந்தச் சாதிய சமூகத்தின் நிகழ்விலிருந்தும் உள்xவெளி முரண்பாடுகளைக் கணக்கிட முயல்வோம். பறையர் என்ற தலித் சமூகத்திற்கு உள்ளேயே ஆண் சாதிக்கும் பெண் சாதிக்கும் இடையில் சண்டை நிகழ்கிறது. ஆணையும் பெண்ணையும் சாதியாகக் குறிப்பிடுவது சரியாகுமா என்கிறீர்களா? பிறப்பால் உயர்வு தாழ்வு கருதுவது பார்ப்பனியரின் சாதியச் சிந்தனை. பிறப்பால் ஆண்களை உயர்வாகவும், பெண்களைத் தாழ்வாகவும் கருதுகிறார்களே. இநதக் கேவலமான சிந்தனையை என்னவென்பீர்கள்? சிறு வித்தியாசந்தான். அது பார்ப்பனியரின் சாதியச் சிந்தனை. இது பாலினத்தின் சாதியச் சிந்தனை. இது பறையர் சமூகத்திற்கு உள்ளேயே நிகழ்ந்திருக்கின்ற பாலினச் சாதியின் சண்டை. எனவே இது உள்முரண்பாடாக இருக்கிறது.
பறையர் சாதிக்கு வெளியிலிருக்கிறது ஆதிக்கச் சாதி. ஆதிக்கச் சாதிக்கு வெளியிலிருக்கிறது பறையர் என்ற தலித் சமூகம். இரண்டிற்கும் இடையில் சண்டையுணர்வு வெளிப்படுகிறது. இவை ஒன்றோடொன்று வெளியிலிருக்கின்ற இரண்டு சாதிகளின் முரண்பாடு. எனவே இது வெளிமுரண்பாடாக இருக்கிறது. உள்xவெளி முரண்பாட்டிலிருந்து நட்புxபகை முரண்பாட்டிற்குச் செல்வோம். இது முரண்பாட்டின் மூன்றாம் தன்மை.
No comments:
Post a Comment