எமது பதிவை படிக்க வந்தமைக்கு நன்றி__*___*__ சமூக விஞ்ஞானியாக மலரவிருக்கும் சகமனிதர்களுக்கு வணக்கம்__*___*__ நாங்கள் எப்போதும் உங்களுடன் __*__*__இந்த ப்ளாக்கை பற்றிய கேள்விகள்,சந்தேகங்கள், கருத்துக்களை அக்கறையுடன் பகிர்ந்து கொள்ளவும் __*__*__ சமூகவிஞ்ஞானக் களங்களில் பங்கேற்க வரவும்__*__*__!

புதிய பதிவுகளை ஈமெயிலில் பெற

Friday, March 1, 2024

ஒரே மாடு! ஒரே போடு!

ஒரே மாடு! ஒரே போடு!

 

கட்டெறும்பு நிலத்தில் காலூன்றி

வானுயர நிற்கிறது பிசாசு

 

வானம் முழுக்க விண்மீன்கள்

டாலர்களாய் மிளிர்கின்றன

காவி இருட்டில் லாப வெறி பிசாசு

பூமியின் சுற்றளவு போல

பெருத்த வயிறுடன் நிற்கின்றது

 

காலுக்கு கீழாக

வணிக வேர் கீற்றுகளால்

உயிர் குடித்து வயிற்றை வளர்க்கின்றது

 

காடு மேடு வீதி வீடென

கோடி கோடியாய் உழைக்கும் நாட்டை

நொடி நொடியாய் உரிந்து

உயிர் வளர்ந்தது பிசாசு

 

செல்வம் தின்னும் செல்லப்பிள்ளைகளுக்கு

வயிற்றுக்கு மேலே அனுதினம் விருந்து

அதன் உருவம் பார்த்தால்

மின்னலிடும் வியப்பு

 

தொப்பி தலை

கோர்ட் சூட் ஆடை

துப்பாக்கி நாவு

வெடிகுண்டு சிரிப்பு

வெளிச்சம் பளீரிடும் கண்கள்

உலகையே வளைத்துண்ணும் மலைப்பாம்பின் தேகம்

மூளையில் போர் வெறி

குயிலும் நரியும் நடனமிடும் பேச்சில்

முகத்தில் பொலிவுறும் பச்சோந்தி பாவனை

 

தேர்தல் திருநாள் நெருங்க

லாப வெறி பிசாசிற்கு சிறப்பு பூஜைகள்

புதியன கழிதலும் பழையன புகுதலும்

புதுவிழா கோலம் சூடின

நாடெங்கும் காவிக் கொடிகள்

பாம்பின் தலைபோல் அசைந்தன

பேரிடி இசைக்க குளிர் மழை கொட்ட

குடிமக்கள் கிறுகிறுத்து நடுங்கினர்

 

கேடி வாய் பூசாரி

படையலிட ஆர்ப்பரித்தான்

வாக்காளர் எந்திர வாளேந்தி

கெக்களித்து உமிழ்ந்தான்

பஞ்சப் பரதேசிகளான நாட்டு மக்கள்

மானம் தொலைந்தார்கள்

 

வண்ணம் நிறைந்த நாட்டு மக்கள்

பிரிந்திசைந்த தருணமெங்கும்

ஒற்றைப் பிண்டமாய் பலியிட துடித்தான்

 

லாப வெறி பிசாசு

வானுயர வளைந்து வளைந்து

பூசாரிக்கு நளினம் செய்தது

உண்ணப் பசித்ததுபோல்

முதலை வாய் திறந்தது

பக்தி மிகுதியால் பூசாரி

வாக்கு எந்திரக் கூர்வாளை

இறுகப் பற்றிக்கொண்டான்

ஒரே நாடு ஒரே மொழி

ஒரே குடி ஒரே கார்டு

ஒரே தேர்தல் ஒரே கட்சி

வானம் அதிர முழங்கினான்

 

காவிக் குண்டர்களால்

இழுத்துவந்தான் பசுமாட்டை

தலை முதல் வால்வரை

பல இன மக்கள்

பல இசை பண்பாடு

பலவித வண்ணங்கள்

வேற்றுமை கடந்த இந்திய ஒற்றுமை

பசுவின் உருவாக வந்து நின்றது

வாள் வெட்டி பலியாகும் வேதனை அறியாது

பூசாரி கேடியின் இழுவைக்கு இசைந்தது

 

இலாப வெறி பிசாசிற்கு

ரத்த வெறி தாகம்

வணங்கி நின்றான் பூசாரி

உடல் முறுக்கி ஆடினான்

 

தேர்தல் எந்திர கூர்வாள் மினுமினுக்க

மந்திரம்போல முணுமுணுத்தான்

ஒரே மாடு! ஒரே போடு!

அதிகம் படித்தவை